وفیات
فاٹا سے قومی اسمبلی کے ممبر اور جماعتِ اہلسنّت، پاکستان کی سپریم کونسل کے رکن جناب صاحبزادہ نور الحق قادری کے بھائی جناب صاحبزادہ نور الدین قادری (خطیب زرگون مسجد، حیات آباد)، ان کے بہنوئی علامہ ہمایوں قادری (شیخ الحدیث، دارالعلوم جنیدیہ غفوریہ، سینیٹر مولانا عبد المالک صاحب کے صاحبزادے) اور صاحبزادہ نور الحق قادری صاحب کے چچا علامہ عبد العظیم قادری (صدر، تنظیم المدارس اہلسنّت، صوبہٴ سرحد) کو ڈرائیور سمیت جمروٹ کے علاقہ میں چند شرپسند عناصر نے شہید کردیا۔ اناللہ وانا الیہ راجعون۔ ادارہٴ تحقیقاتِ امام احمد رضا انٹرنیشنل، کراچی کی مجلسِ عاملہ کے اراکین ان تمام مرحومین کے درجات کی بلندی کی دعا کرتے ہیں اور سوگواران سے دلی تعزیت کا اظہار کرتے ہیں۔
1۔ انوارِ رضا اور ماہنامہ ”سوئے حجاز“ کے مدیرِ اعلیٰ ملک محبوب الرسول قادری کے والدِ ماجد جناب ملک عبد الرسول قادری 29/ربیع الآخر 1429ھ بمطابق 6/مئی 2008ء کو جوہر آباد میں وصال فرماگئے۔ انا للہ وانا الیہ راجعون۔ مرحوم کی عمر تقریبا 80سال تھی۔ وہ 1929ء میں جوہر آباد میں تاریخی بادشاہی مسجد کے خطیب اور عظیم روحانی شخصیت حضرت حافظ سید رسول نقشبندی رحمہ اللہ تعالیٰ کے گھر پیدا ہوئے۔ آپ ایک مجاہد صفت بزرگ تھے۔ جامع مسجد غوثیہ، جوہر آباد میں آپ کی نمازِ جنازہ آستانہٴ عالیہ بیریل شریف کے سجادہ نشین اور ادارہٴ معین الاسلام کے بانی سربراہ صاحبزادہ پروفیسر محبوب حسین چشتی نے پڑھائی اور علماء و مشائخ کی کثیر تعداد سمیت ہزاروں افراد نے آپ کے جنازے میں شرکت کی۔
2۔ جماعتِ اہلِ سنت کراچی کے امیر علامہ سید شاہ تراب الحق قادری صاحب دامت برکاتہم العالیہ کے برادرِ اکبر جناب شاہ سیف اللہ قادری صاحب بروز پیر 19/مئی 2008ء مطابق 13جمادی الاولیٰ 1429ھ کو انتقال فرماگئے۔ انا للہ وانا الیہ راجعون۔ مرحوم کی نمازِ جنازہ بروز بدھ 21/مئی 2008ء کو صبح دس بجے جامع مسجد مدینہ، کورنگی، کراچی میں آپ کے برادرِ اصغر حضرت علامہ سید شاہ تراب الحق قادری مدظلہ نے پڑھائی۔
ادارہٴ تحقیقاتِ امام احمد رضا انٹرنیشنل، کراچی کے صدر صاحبزادہ سید وجاہت رسول قادری، جنرل سیکریٹری پروفیسر ڈاکٹر مجید اللہ قادری و دیگر اراکینِ مجلسِ عاملہ نے مرحومین کے لواحقین سے دلی تعزیت اور رنج و غم کا اظہار کرتے ہوئے مرحومین کے درجات کی بلندی کی دعا فرمائی۔
جون 2008 | تبصرہ کریں »